ഫ്രാൻസിസ് മാർപാപ്പയുടെ കത്തിനെ തെറ്റായി വ്യാഖാനിച്ചാണ് കുർബാന ഏകീകരിക്കാനുള്ള തീരുമാനം സിനഡിൽ ഉണ്ടായത്. ആരോടും ആലോചിക്കുകയോ ചർച്ച ചെയ്യുകയോ ചെയ്യാതെ സ്വീകരിച്ച തീരുമാനം നടപ്പിലാക്കരുത്. നിലവിലെ കുർബാന രീതി തന്നെ തുടരണം. തീരുമാനത്തില്‍ മാറ്റമുണ്ടായില്ലെങ്കില്‍ മെത്രാന്‍മാരുടെ നേതൃത്വത്തില്‍ മാര്‍പ്പാപ്പയെ കാണുമെന്നും വൈദികര്‍ പറഞ്ഞു.
നിലവിലെ ജനാഭിമുഖമായുള്ള കുബാന രീതി തുടരണം. പുതിയ മാറ്റത്തിൽ ഒരു വിഭാഗം വൈദികരിൽ നിന്നും വിശ്വാസികളിൽ നിന്നും എതിർപ്പുണ്ടാകുന്നുണ്ട്. ജനാഭിമുഖ കുര്‍ബാനയില്‍ നിന്ന് പിന്നോട്ട് പോകാൻ കഴിയില്ലെന്നും പ്രത്യേക യോഗം ചേർന്ന വൈദികർ പ്രമേയത്തിലൂടെ വ്യക്തമാക്കി. വൈദികര്‍ ബിഷപ്പ് ആന്റണി കരിയിലിനെ നേരില്‍ കണ്ട് വൈദികർ എതിര്‍പ്പ് അറിയിക്കുകയും ചെയ്തു.
കർദിനാൾ മാർ ജോർജ് ആലഞ്ചേരിക്കെതിരെയും വൈദികർ വിമർശനം ഉന്നയിച്ചു. ഭൂമിയിടപാടുമായി ബന്ധപ്പെട്ട കേസുകളിൽ നിന്ന് ശ്രദ്ധ തിരിക്കാനാണ് ഇത്തരം വിവാദങ്ങളെന്നും ഇവർ വ്യക്തമാക്കി. അതേസമയം, തടയുന്നവർക്കെതിരെ നടപടി ആവശ്യമാണെന്ന് വ്യക്തമാക്കി ഒരു വിഭാഗം വിശ്വാസികൾ ബിഷപ്പ് ഹൗസിന് മുന്നിൽ എതിർപ്പുമായി എത്തി.
സിനഡിൻ്റെ ഭാഗത്ത് നിന്നുമുണ്ടായ തീരുമാനത്തെ അംഗീകരിക്കാൻ കഴിയില്ലെന്ന വാദമാണ് എറണാകുളം അങ്കമാലി അതിരൂപതയിലെ ഒരു വിഭാഗം വൈദികർ ഉന്നയിക്കുന്നത്. ഒരു വിഭാഗം വിശ്വാസികളുടെ പിന്തുണ തങ്ങൾക്കുണ്ടെന്നും ഇവർ വ്യക്തമാക്കുന്നുണ്ട്. ഏകീകരണ രീതി നിർബന്ധിച്ച് അടിച്ചേൽപ്പിക്കാൻ ശ്രമിച്ചാൽ സഭയുടെ ഐക്യത്തെ ബാധിക്കുമെന്ന് വൈദികർ വിലയിരുത്തുന്നുണ്ട്.
കുർബാന ഏകീകരണം സംബന്ധിച്ച് കർദിനാൾ മാർ ജോർജ് ആലഞ്ചേരിയുടെ ഇടയലേഖനം ഞായറാഴ്ച പള്ളികളിൽ വായിക്കാനിരിക്കെയാണ് എറണാകുളം അങ്കമാലി അതിരൂപതയിലെ ഒരു വിഭാഗം വൈദികർ എതിർപ്പ് രൂക്ഷമാക്കുന്നത്. മാർപാപ്പയുടെ നിർദേശം അംഗീകരിക്കാനും നടപ്പിലാക്കാനുമുള്ള ഉത്തരവാദിത്തം എല്ലാവർക്കുമുണ്ടെന്ന് വ്യക്തമാക്കുന്ന ഇടയലേഖനത്തിൽ അൾത്താരയിൽ ഐക്യം ഇല്ലാതെ സഭയിൽ ഒത്തൊരുമ ഉണ്ടാകില്ലെന്ന് വ്യക്തമാക്കുന്നുണ്ടെന്നാണ് റിപ്പോർട്ട്. മാർപാപ്പയുടെ നിർദേശം മറികടന്ന് തീരുമാനങ്ങളിലേക്ക് കടക്കാൻ അതിരൂപതാ മെത്രാൻമാര്‍ക്ക് അധികാരം ഇല്ലെന്നും ഇടയലേഖനം ചൂണ്ടിക്കാട്ടുന്നുണ്ട്.
സീറോ മലബാർ സഭയുടെ കുർബാന ആചരണത്തിൽ വിവിധ സ്ഥലങ്ങളിൽ പല രീതിയിലുള്ള രീതികളാണ് പിന്തുടരുന്നത്. വിശ്വാസികളെ അഭിമുഖീകരിച്ചും ബലിപീഠത്തെ അഭിമുഖീകരിച്ചുമാണ് കുർബാനയിലെ ഭാഗങ്ങൾ ചൊല്ലുന്നത്. എന്നാൽ, കുർബാനയുടെ ആദ്യഭാഗം ജനങ്ങൾ അഭിമുഖമായും പ്രധാന ഭാഗം അൾത്താരയ്ക്ക് അഭിമുഖമായും നടത്തണമെന്നാണ് വത്തിക്കാൻ നൽകിയിരിക്കുന്ന നിർദേശം. മാർപാപ്പ നൽകിയിരിക്കുന്ന ഈ നിർദേശത്തിനെതിരെയാണ് ഒരു വിഭാഗം വൈദികർ രംഗത്തുവന്നിരിക്കുന്നത്. എറണാകുളം – അങ്കമാലി അതിരൂപതയടക്കം ആറ് അതിരൂപതകളിൽ ജനാഭിമുഖമായിട്ടാണ് കുർബാന നടത്തുന്നത്.
