ലണ്ടണ്> സമ്മർ ട്രാൻസ്ഫർ വിൻഡോ അവസാനിക്കാൻ മണിക്കൂർ മാത്രം ശേഷിക്കെ ആകാംക്ഷയിൽ ഫുട്ബോൾ ലോകം. ലെയണൽ മെസിയുടെയും സെർജിയോ റാമോസിന്റെയും ഡേവിഡ് ആൽബയുടെയും ജാക്ക് ഗ്രീലിഷിന്റെയുമെല്ലാം കൂടുമാറ്റങ്ങൾകൊണ്ട് ലോകശ്രദ്ധ നേടിയ ഈ ട്രാൻസ്ഫർ വിൻഡോ അവസാന മിനിറ്റിലേക്ക് അടുക്കുമ്പോഴും ത്രില്ലറുകൾക്ക് കുറവില്ല.
പുറത്തുവരുന്ന വാർത്തകൾ അനുസരിച്ച് യുവന്റസിൽ നിന്ന് കരിയറിൽ പേരും പെരുമയും സമ്മാനിച്ച ഇംഗ്ലണ്ടിലേക്ക് മടങ്ങാൻ ഒരുങ്ങുകയാണ് പോർച്ചുഗൽ ഇതിഹാസം ക്രിസ്റ്റ്യാനോ റൊണാൾഡോ. യുവന്റസിലെ തന്റെ സഹതാരങ്ങളോട് ഔദ്യോഗികമായി താരം യാത്ര പറഞ്ഞുകഴിഞ്ഞതായാണ് അന്താരാഷ്ട്ര കായിക മാധ്യമങ്ങൾ റിപ്പോർട്ട് ചെയ്യുന്നത്. സിറ്റിയുമായുള്ള ചർച്ചകൾ ധാരണയിലെത്തിയതായാണ് സൂചന. ഔദ്യോഗികമായി സിറ്റി യുവന്റസിന് ബിഡ് സമർപ്പിച്ചാൽ ട്രാൻസ്ഫർ നടപടികൾ പൂർത്തിയാകും. അതുവരെ യുവന്റസ് ടീമിൽ നിന്ന് വിട്ടു നിൽക്കാനാണ് റൊണാൾഡോയുടെ
തീരുമാനം.
കൈമാറ്റതുകയായി എകദേശം 260 കോടി രൂപ സിറ്റി ഇറ്റാലിയൻ ചമ്പ്യൻമാർക്ക് നൽകാൻ തയ്യാറായതോടെയാണ് ഒരാഴ്ച മുമ്പുവരെ ആരും പ്രതീക്ഷിക്കാതിരുന്ന ട്രാൻസ്ഫറിന് വേഗം പകർന്നത്. ആദ്യ ചമ്പ്യൻസ് ലീഗ് കിരീടമെന്ന സിറ്റിയുടെയും ആറാം യൂറോപ്യൻ കിരീടമെന്ന റൊണാൾഡോയുടെയും ആഗ്രഹമാണ് തീരുമാനത്തിന് പിന്നിൽ. റൊണാൾഡോയെ താരമാക്കിയ മാഞ്ചസ്റ്റർ യൂണൈറ്റഡിന്റെ ചിരവൈരികളായ സിറ്റിയിലേക്ക് റൊണോ പോകുമോ എന്നതാണ് യുണൈറ്റഡ് ആരാധകരുടെ ആശങ്ക. ട്രാൻസ്ഫർ നടപടികൾ പൂർത്തിയാകുന്നതോടെ വിവാ റൊണാൾഡോ ചാന്റ്സ് ലോകത്തെ പാടി കേൾപ്പിച്ച മാഞ്ചസ്റ്ററിൽ വീണ്ടും റൊണോയ്ക്കായി ആർപ്പുവിളികളുയരും.
അപ്രതീക്ഷിത സൈനിങുകൾ കൊണ്ട് ഈ സീസണിൽ ലോകത്തെ ഞെട്ടിച്ച പിഎസ്ജിയിൽ നിന്നാണ് മറ്റൊരു പ്രധാന ട്രാൻസ്ഫർ വാർത്ത വരുന്നത്. പിഎസ്ജിയുടെ മുന്നേറ്റക്കാരൻ കിലിയൻ എംബാപ്പെയ്ക്കായി സ്പാനിഷ് വമ്പൻമാരായ റയൽ മാഡ്രിഡ് നടത്തുന്ന ശ്രമങ്ങൾ ഊർജിതമാക്കി. 1400 കോടി രൂപയാണ് ഇരുപത്തിരണ്ടുകാരന് റയലിന്റെ വാഗ്ദാനം. നെയ്മറിന് പിന്നാലെ മെസിയും എത്തിയതോടെയാണ് പിഎസ്ജി വിടാനുള്ള മോഹം ഫ്രഞ്ച് താരം വ്യക്തമാക്കിയത്. മെസിയുടെ നിഴലിൽ തന്റെ അവസരങ്ങൾ ഇല്ലാതാകുമൊ എന്ന ആശങ്കയാണ് തീരുമാനത്തിന് പിന്നിലെന്നാണ് സൂചന.
അടുത്ത ജൂൺ വരെ കരാറുണ്ടെങ്കിലും തുടരാനില്ലെന്ന് എംബാപ്പെ ക്ലബ്ബിനെ അറിയിച്ചു കഴിഞ്ഞു. റയലിന്റെ തൂവെള്ള കുപ്പായത്തിൽ തന്റെ എക്കാലത്തെയും ആരാധപാത്രമായ സിനദിൻ സിദാന്റെ 5‐ാം നമ്പർ കുപ്പായത്തിൽ അടുത്ത സീസൺ മുതൽ എംബാബേ പന്തുതട്ടും എന്നുതന്നെ കരുതാം. ചാമ്പ്യൻസ് ലീഗ് ഗ്രൂപ്പ് സ്റ്റേജിൽ സിറ്റിയും പിഎസ്ജിയും ഒരേ ഗ്രൂപ്പിലായതോടെ മെസിയും റൊണാൾഡേയും നേർക്കുനേർ എറ്റുമുട്ടുന്നത് കാണാനാകുമെന്ന പ്രതീക്ഷയിലാണ് ആരാധകർ. ആകാംഷകൾക്കും ആശങ്കകൾക്കും വിരാമമാകാൻ എന്തായാലും ട്രാൻസ്ഫർ വിൻഡോ അവസാനിക്കുന്ന ആഗസ്റ്റ് 31 വരെ കാത്തിരുന്നേ മതിയാകൂ.
