തിരുവനന്തപുരം: രണ്ടാം പിണറായി സർക്കാർ 100-ാം ദിനം പൂർത്തിയാകുന്നതിനോടനുബന്ധിച്ച് 115 കർമ്മപദ്ധതികൾ പൂർത്തീകരിക്കുന്നതിന്റെ ഭാഗമായി റവന്യു വകുപ്പ് 13,600ലേറെ പട്ടയങ്ങൾ വിതരണം ചെയ്യുമെന്ന് റവന്യു മന്ത്രി കെ.രാജൻ.
സർക്കാർ അധികാരത്തിൽ വരുമ്പോൾ തന്നെ അവതരിപ്പിച്ച റവന്യു വകുപ്പിന്റെ ലക്ഷ്യം എല്ലാവർക്കും ഭൂമി, എല്ലാ ഭൂമിക്കും രേഖ, എല്ലാ പ്രവർത്തനങ്ങളും സ്മാർട്ട് എന്നാണ്. ആദ്യത്തെ നൂറ് ദിവസത്തിൽ തന്നെ ഈ മുദ്രാവാക്യങ്ങളുടെ അന്തഃസത്ത അഞ്ചുവർഷംകൊണ്ടുതന്നെ പൂർത്തിയാക്കാൻ കഴിയുമെന്ന് ബോധ്യപ്പെടുത്താൻ കഴിയുന്ന തരത്തിലുള്ള പരിപാടികൾ തയ്യാറാക്കി മുന്നാട്ടുപോകാൻ സർക്കാരിന് കഴിഞ്ഞു.
അർഹരായ മുഴുവൻ പേർക്കും പട്ടയം കൊടുക്കുക എന്ന ലക്ഷ്യം പൂർത്തീകരിക്കണം എന്നാണ് സർക്കാർ ആഗ്രഹിക്കുന്നത്. 100 ദിവസത്തിനുള്ളിൽ പതിനായിരം പട്ടയം നൽകാൻ പരിശ്രമിക്കണമെന്നാണ് മുഖ്യമന്ത്രി ആവശ്യപ്പെട്ടത്. ആദ്യഘട്ട ചർച്ചയിൽ തന്നെ 12,000 പട്ടയങ്ങൾ കൊടുക്കാൻ സാധിക്കുമെന്ന് മുഖ്യമന്ത്രിക്ക് റവന്യു വകുപ്പ് ഉറപ്പ് നൽകിയിരുന്നു. എന്നാൽ ഇതിനോടകം തന്നെ 13600ലേറെ പട്ടയങ്ങൾ തയ്യാറായിക്കഴിഞ്ഞുവെന്ന് മന്ത്രി മാതൃഭൂമി ന്യൂസിനോട് പറഞ്ഞു. പട്ടയങ്ങളുടെ എണ്ണം ഇനിയും കൂടാനാണ് സാധ്യതയെന്നും മന്ത്രി കൂട്ടിച്ചേർത്തു.
തയ്യാറാക്കിയ പട്ടയങ്ങൾ അടുത്ത മാസം 14ന് മുഖ്യമന്ത്രി പട്ടയമേളയിലൂടെ വിതരണം ചെയ്യുമെന്ന് റവന്യു മന്ത്രി കെ.രാജൻ അറിയിച്ചു. തൃശ്ശൂരിലാണ് പട്ടയമേളയുടെ സംസ്ഥാനതല ഉത്ഘാടനം നടക്കുക. ഓൺലൈനിലൂടെ മുഖ്യമന്ത്രി തന്നെയാണ് ഉത്ഘാടനം നിർവ്വഹിക്കുകയെന്നും മന്ത്രി മാതൃഭൂമി ന്യൂസിനോട് പറഞ്ഞു.
Content highlights: Over thirteenthousand deeds will be distributed soon says revenue minister k rajan
