തിരുവനന്തപുരം> ഫെയ്സ്ബുക്കിലൂടെ സഹായമഭ്യര്ഥിച്ച കുടുംബത്തിന് മണിക്കൂറുകള്ക്കുളളില് സഹായവുമായി ആരോഗ്യമന്ത്രി വീണാ ജോര്ജ്. കണ്ണൂര് പുതിയ തെരു സ്വദേശികളായ ഷാനവാസിന്റേയും ഷംസീറയുടേയും മകനായ ഹൈസിന് ഷാനാണ് മന്ത്രിയുടെ എല്ലാവിധ പിന്തുണയും സഹായവുമെത്തിയത്. ഹൃദയ സംബന്ധമായ രോഗം ബാധിച്ച് കോഴിക്കോട് സ്വകാര്യ ആശുപത്രിയില് ഗുരുതരാവസ്ഥയില് ചികിത്സയില് കഴിയുകയായിരുന്നു രണ്ട് മാസം പ്രായമായ ഹൈസിന്.
ഹൈസിന്റെ കാര്യത്തില് മറ്റ് പ്രതീക്ഷകളൊന്നുമില്ലെന്ന് പറഞ്ഞ് ഡോക്ടര്മാര് കൈയൊഴിഞ്ഞതോടെയാണ് അവസാന ശ്രമമെന്ന നിലയില് പിതാവ് ഷാനവാസ് മന്ത്രിയുടെ ഫെയ്സ്ബുക്ക് പേജിലേക്ക് സഹായം അഭ്യര്ഥിച്ച് സന്ദേശം അയച്ചത്. സന്ദേശം അയച്ച് അരമണിക്കൂര് കഴിഞ്ഞപ്പോള് തന്നെ മന്ത്രി ഇടപെടുകയും വേണ്ട സജ്ജീകരണങ്ങള് തയാറാക്കി കുഞ്ഞിനെ അമൃത ആശുപത്രിയിലേക്ക് മാറ്റുകയുമായിരുന്നു
അവസാന പ്രതീക്ഷയായാണ് മന്ത്രിക്ക് സഹായം അഭ്യര്ഥിച്ച് ഫെയ്സ്ബുക്കിലൂടെ സന്ദേശമയച്ചത്. അത് കഴിഞ്ഞ് പിന്നീട് മറുപടി വന്നോ എന്നുള്ള കാര്യമൊന്നും നോക്കാന് പറ്റിയ മാനസികാവസ്ഥയിലായിരുന്നില്ല. മെസേജ് അയച്ച് അരമണിക്കൂര് കഴിയുമ്പോള് തന്നെ മന്ത്രി കുഞ്ഞിനെ അമൃതയിലേക്ക് മാറ്റുന്നതിന് വേണ്ട സജ്ജീകരണങ്ങള് ചെയ്തിരുന്നു. മന്ത്രി ഇടപെടല് നടത്തിയതെല്ലാം പിറ്റേ ദിവസം മന്ത്രി തന്നെ നേരിട്ട് വിളിച്ചപ്പോഴാണ് അറിഞ്ഞത്. കുഞ്ഞിന്റെ ആരോഗ്യസ്ഥിതിയില് നേരിയ പുരോഗതയുണ്ട്. പക്ഷേ ഇപ്പോഴും ഗുരുതരാവസ്ഥയില് തന്നെയാണ്- ഷാനവാസ് പറഞ്ഞു.
ഹൈസിന്റെ കാര്യത്തില് ഇനിയും രണ്ട് ദിവസങ്ങള് കൂടി കഴിഞ്ഞാല് മാത്രമേ ഗുരുതരാവസ്ഥ പിന്നിട്ടതായി പറയാന് കഴിയുകയുള്ളു. 120 കുട്ടികളില് ഒരു കുട്ടിക്ക് എന്ന നിലക്ക് ഇപ്പോള് ഈ രോഗം കണ്ടുവരുന്നുണ്ട്- കൊച്ചി അമൃത ആശുപത്രിയിലെ പീഡിയാട്രിക് കാര്ഡിയോളജി വിഭാഗം മേധാവി ഡോ.കൃഷ്ണകുമാര് പറഞ്ഞു.
