ന്യൂഡൽഹി
അണ്ടർ 19 ലോകകപ്പ് ക്രിക്കറ്റിൽ ഇന്ത്യയെ കിരീടത്തിലേക്ക് നയിച്ച ഉൻമുക്ത് ചന്ദ് വിരമിച്ചു. ഇന്ത്യക്കായി ഇനി കളിക്കാനില്ലെന്ന് ഇരുപത്തെട്ടുകാരൻ അറിയിച്ചു. വിദേശ ലീഗുകളിൽ കളിക്കാനാണ് ചന്ദിന്റെ ഒരുക്കം. അമേരിക്കൻ ലീഗിൽ കളിച്ചേക്കും.
2012 അണ്ടർ 19 ലോകകപ്പിൽ ഇന്ത്യൻ ടീമിന്റെ ക്യാപ്റ്റനായിരുന്നു. ഫെെനലിൽ ഓസ്ട്രേലിയക്കെതിരെ സെഞ്ചുറിയുമായി ഇന്ത്യയെ ജയത്തിലേക്ക് നയിച്ചു. മാൻ ഓഫ് ദി മാച്ച് പുരസ്കാരവും നേടി.
ഒന്നാംക്ലാസ് ക്രിക്കറ്റിൽ 67 മത്സരങ്ങളിൽ 3379 റൺ നേടി. രഞ്ജി ട്രോഫിയിൽ ഡൽഹിക്കായി മികച്ച തുടക്കംകുറിച്ചെങ്കിലും മികവ് തുടരാനായില്ല. ഐപിഎല്ലിലും മങ്ങി. ഡൽഹി ടീമിൽനിന്ന് പുറത്തായതിനെ തുടർന്ന് ഉത്തരാഖണ്ഡിനുവേണ്ടി രഞ്ജി കളിക്കാനിറങ്ങി. ഫോം വീണ്ടെടുക്കാനായില്ല. ഇന്ത്യൻ എ ടീമിനെ നയിച്ചിട്ടുണ്ട്.
