തിരുവനന്തപുരം: റിസോർട്ട് റെയ്ഡ് ചെയ്തശേഷം കൈക്കൂലി ചോദിച്ചെന്ന പരാതിയെത്തുടർന്ന് ആറ്റിങ്ങൽ മുൻ ഡിവൈഎസ്പി എസ് വൈ സുരേഷിനെ സസ്പെന്റ് ചെയ്തു. രണ്ട് ഇടനിലക്കാർ വഴി റിസോർട്ട് ഉടമകളെ കേസിൽ നിന്നും രക്ഷിക്കാൻ മാസപ്പടി ആവശ്യപ്പെട്ടെന്നാണ് വിജിലൻസിന്റെ കണ്ടെത്തൽ.
സുരേഷ് ഇടനിലക്കാരെ പലകുറി ഫോണിൽ വിളിച്ചതിന് തെളിവുണ്ടെന്ന് വിജിലൻസ് അറിയിച്ചു. ഇതോടെയാണ് സസ്പെന്റ് ചെയ്തത്. വകുപ്പുതല തുടർ അന്വേഷണത്തിനും ഉത്തരവുണ്ട്.
വിജിലൻസ് റിപ്പോർട്ടിന്റെ അടിസ്ഥാനത്തിൽ ആഭ്യന്തര സെക്രട്ടറിയാണ് സുരേഷിനെ സസ്പെന്റ് ചെയ്ത് ഉത്തരവിട്ടത്. പേട്ട സിഐ ആയിരിക്കെ കൊലക്കേസിൽ കുറ്റപത്രം സമർപ്പിക്കാൻ വൈകിയതിനും സുരേഷിനെ സസ്പെന്റ് ചെയ്തിട്ടുണ്ട്.
കടയ്ക്കാവൂരിൽ മകന്റെ മൊഴി പ്രകാരം അമ്മയ്ക്കെതിരെ പോക്സോ കേസ് ചുമത്തി അറസ്റ്റ് ചെയ്ത കേസിലെ അന്വേഷണ ഉദ്യോഗസ്ഥനും സുരേഷായിരുന്നു.
