Also Read :
ഇത്തരം സംഭവങ്ങളില്‍ പോലീസ് മൃദുസമീപനം സ്വീകരിക്കില്ലെന്ന് മുഖ്യമന്ത്രി വ്യക്തമാക്കി. സ്ത്രീകള്‍ക്കെതിരായ അതിക്രമങ്ങളുമായി ബന്ധപ്പെട്ട് എംഎൽഎമാരുടെ ചോദ്യത്തിന് മറുപടി പറയുകയായിരുന്നു അദ്ദേഹം.
കോതമംഗലം നെലിലിക്കുഴിയിൽ ബിഡിഎസ് വിദ്യാര്‍ത്ഥിനി മാനസയെ വെടിവച്ചു കൊന്ന സംഭവം ഞെട്ടിച്ചുവെന്ന് പറഞ്ഞുകൊണ്ടാണ് മുഖ്യമന്ത്രി വിഷയം വ്യക്തമാക്കിയത്.
എംഎൽഎ പിടി തോമസ്, തിരുവഞ്ചൂര്‍ രാധാകൃഷ്ണൻ എന്നിവരുടെ ചോദ്യങ്ങള്‍ക്ക് മറുപടി പറയുകയായിരുന്നു മുഖ്യമന്ത്രി.
മുഖ്യമന്ത്രിയുടെ വാക്കുകള്‍ ഇങ്ങനെ, “കോതമംഗലത്ത് ഡന്റല്‍ വിദ്യാര്‍ഥിനിയുടെ കൊലപാതകം വളരെ കൃത്യമായി ആസുത്രണം ചെയ്താണ് നടപ്പാക്കിയത്. സൈബര്‍ ലോകത്ത് അതിവിപുലമായ ചതിക്കുഴി ഒരുക്കി ഒരു കൂട്ടര്‍ നീങ്ങുകയാണ്. വളരെ വലിയ തോതില്‍ ശ്രദ്ധിക്കപ്പെടേണ്ട ഒരു കാര്യമാണിത്. നമ്മുടെ പെണ്‍കുട്ടികള്‍ ഒരു നിശ്ചിത പ്രായത്തിലെത്തുമ്പോള്‍ ചതിക്കുഴിയില്‍ പെടുത്താനാണ് ഇത്തരക്കാര്‍ ശ്രമിക്കുന്നത്,”
“ഈ പ്രശ്നങ്ങള്‍ കേവലം സൈബര്‍ രീതിയില്‍ മാത്രം കൈകാര്യം ചെയ്താല്‍ പോരാ. മാനസികമായും കുട്ടി ഇതിനോട് അടിപ്പെട്ട് പോയിട്ടുണ്ട്. അതില്‍ നിന്ന് മോചിപ്പിക്കാനുള്ള നീക്കങ്ങള്‍ കൂടി നടത്തേണ്ടതുണ്ട്. അത്തരത്തിലാണ് പലരേയും യഥാര്‍ത്ഥത്തിൽ രക്ഷപെടുത്തിയിട്ടുള്ളത്,”
“പൊലീസ് അന്വേഷണം ഇത്തരം കേസുകളില്‍ പ്രധാനമാണ്. അന്വേഷണ മികവിന്റെ ഭാഗമായാണ് ഇത്തരത്തിൽ കുറ്റവാളികളെ കണ്ടെത്താനാകുന്നത്. നമ്മുടെ തന്നെ അനുഭവത്തിൽ ജിഷ കൊലക്കേസില്‍ ഒരു തെളിവും ഇല്ലായിരുന്നു എന്നാണ് കരുതിയിരുന്നത്. ഫലപ്രദമായ അന്വേഷണത്തിലൂടെ കേസ് തെളിയിക്കാനും കുറ്റവാളിയെ കണ്ടെത്താനും സാധിച്ചു. ഇനിയും ഇത്തരം നടപടികള്‍ സ്വീകരിക്കാന്‍ തന്നെയാണ് തീരുമാനം, ഇപ്പോള്‍ ഏര്‍പ്പെടുത്താൻ ഉദ്ദേശിച്ചിട്ടുള്ളതും അത്തരത്തിലുള്ളത് തന്നെയാണ്” മുഖ്യമന്ത്രി പിണറായി വിജയന്‍ കൂട്ടിച്ചേര്‍ത്തു.
