തിരുവനന്തപുരം: വിവിധ വിഷയങ്ങൾ സംബന്ധിച്ചുള്ള ഓർഡിനൻസുകൾ നിയമസഭയിൽ കൊണ്ടു വന്ന് നിയമമാക്കാതെ ആവർത്തിച്ച് പുതുക്കുന്നതിൽ അതൃപ്തി പ്രകടിപ്പിച്ച് സ്പീക്കർ എം ബി രാജേഷ്. നിലവിലെ ഓർഡിനൻസുകൾ നിയമമാക്കാൻ ഒക്ടോബർ നവംബർ മാസങ്ങളിൽ നിയമസഭയുടെ പ്രത്യേക സമ്മേളനം ചേരണമെന്ന് സ്പീക്കർ നിർദേശിച്ചു.
ഓർഡിനൻസുകൾ വീണ്ടും വീണ്ടും പുതുക്കുന്ന അവസ്ഥക്ക് മാറ്റം വരണം. ഓർഡിനൻസിന് പകരം നിയമം പാസാക്കാൻ നിയമവകുപ്പിന്റെ നേതൃത്വത്തിൽ ആക്ഷൻ പ്ലാൻ തയ്യാറാക്കണമെന്നും സ്പീക്കർ റൂളിംഗ് നൽകി.
ഇതിന് പുറമെ കിഫ്ബിയുടെ ധനവിനിയോഗം നിയമസഭാ സമിതിക്ക് പരിശോധിക്കാമെന്ന് സ്പീക്കർ മറ്റൊരു റൂളിങ്ങിലൂടെ വ്യക്തമാക്കി. സാമ്പത്തിക കാര്യങ്ങൾ സംബന്ധിച്ച സബ്ജക്ട് കമ്മിറ്റിയുടെ സൂക്ഷ്മ പരിശോധനാ പരിധിയിൽ കിഫ് ബി യുമായി ബന്ധപ്പെട്ട ചെലവുകൾ ഉൾപ്പെടുന്നില്ലെന്ന് കോൺഗ്രസ് അംഗം എ.പി അനിൽകുമാർ ചൂണ്ടിക്കാട്ടി. ഇതേ തുടർന്നാണ് സ്പീക്കറുടെ നടപടി.
കിഫ്ബി യുമായി ബന്ധപ്പെട്ട സി.എ.ജി പരാമർശങ്ങൾ പരിശോധിക്കാനുള്ള പി.എ.സിയുടെ അധികാരത്തെ ദുർബലപ്പെടുത്തിയിട്ടില്ലെന്നും സ്പീക്കർ പറഞ്ഞു. നടപടിക്രമം പാലിക്കാത്ത സിഎജിയുടെ പരാമർശത്തെയാണ് നിയമസഭ നിരാകരിച്ചതെന്നും സ്പീക്കർ പറഞ്ഞു.
Content Highlights: Speaker MB Rajesh expressed discomfort on renewel of ordinances without being brought to assembly
