കുഞ്ഞാലിക്കുട്ടിയുടെ മടങ്ങിവരവ് തിരിച്ചടിയായെന്നും തെരഞ്ഞെടുപ്പുകളിൽ ലീഗിന് തുടർച്ചയായി ജനപിന്തുണ കുറയുകയാണെന്നും അഭിപ്രായം ഉയർന്നു. അതേക്കുറിച്ച് ചർച്ച ഉയരുന്നില്ലെന്നാണ് പ്രധാന വിമർശനം. പാർട്ടിക്ക് രാഷ്ട്രീയം കൈമോശം വന്നു. ജനാധിപത്യ സ്വഭാവം നഷ്ടമായി. ഭരണഘടനാപരമല്ലാത്ത ഉന്നതാധികാര സമിതി പാർട്ടിയെ നിയന്ത്രിക്കുന്ന അവസ്ഥ വന്നു. പരാജയത്തിന്റെ കാരണം ചർച്ച ചെയ്യാൻ പാർട്ടി തയ്യാറാകണമെന്ന് യോഗത്തിൽ വിഷയാവതരണം നടത്തിയ റഫീഖ് തിരുവള്ളൂർ പറഞ്ഞു.
അന്തരിച്ച യൂത്ത് ലീഗ് പ്രവർത്തകൻ പിഎം ഹനീഫിന്റെ പേരിൽ ചേർന്ന അനുസ്മരണ യോഗത്തിൽ കെഎം ഷാജി, പിഎം സ്വാദിഖലി, ടിടി ഇസ്മായിൽ സമദ് പൂക്കാട്, അഷ്റഫ് കോക്കൂർ തുടങ്ങിയവർ പങ്കെടുത്തു. മണ്ഡലം ഭാരവാഹികളായ 150 ഓളം പേർ യോഗത്തിൽ പങ്കെടുത്തുവെന്നാണ് റിപ്പോർട്ട്. അനുസ്മരണ സമ്മേളനം എന്ന പേരിലാണ് യോഗം വിളിച്ചതെങ്കിലും പാർട്ടി വിമർശനമാണ് സമ്മേളനത്തിൽ ഉയർന്നതെന്നും റിപ്പോർട്ടിൽ പറയുന്നു.
