കോട്ടയം
ദക്ഷിണമേഖലാ അന്തർ സർവകലാശാല കലോത്സവത്തിൽ എംജി സർവകലാശാലക്ക് രണ്ടാം സ്ഥാനം. 47 വിദ്യാർഥികളാണ് സർവകലാശാലയെ പ്രതിനിധീകരിച്ച് തിരുപ്പതി ശ്രീ പത്മാവതി മഹിള വിശ്വവിദ്യാലയത്തിൽ നടന്ന 36 -ാമത് കലോത്സവത്തിൽ പങ്കെടുത്തത്. കേരള സർവകലാശാലയാണ് ജേതാക്കൾ.
ആറിനങ്ങളിൽ ഒന്നാം സ്ഥാനവും ഒരിനത്തിൽ രണ്ടാം സ്ഥാനവും മൂന്നിനങ്ങളിൽ മൂന്നാം സ്ഥാനവും ഉൾപ്പെടെ 36 പോയിന്റ് എംജി നേടി. ഒന്നു മുതൽ മൂന്നു വരെ സ്ഥാനങ്ങൾ നേടിയവർ ഫെബ്രുവരി 24 മുതൽ ബംഗളൂരു ജെയ്ൻ സർവകലാശാലയിൽ നടക്കുന്ന അഖിലേന്ത്യാ അന്തർ സർവകലാശാല കലോത്സവത്തിൽ പങ്കെടുക്കാൻ യോഗ്യത നേടി.
സർവകലാശാലാ സ്റ്റുഡന്റ്സ് സർവീസ് ഡയറക്ടർ പ്രൊഫ. ഏബ്രഹാം കെ സാമുവൽ, അസിസ്റ്റന്റ് പ്രൊഫസർ സി ജി മഞ്ജുഷ, ഡിഎസ്എസ് അഡ്മിനിസ്ട്രേറ്റീവ് ഓഫീസർ പി എം ബാബു, സുജിൻ രാജ് എന്നിവർ സർവകലാശാല ടീമിന്റെ ഏകോപനം നിർവഹിച്ചു.
