കരിപ്പൂർ> കസ്റ്റംസിനെ വെട്ടിച്ച് പുറത്തു കടത്താൻ ശ്രമിച്ച 1.017 കിലോഗ്രാം സ്വർണം കരിപ്പൂർ പൊലീസ് പിടികൂടി. കണ്ണൂർ കുറുവയിലെ തമസ് കോട്ടേജിലെ കെ പി ഉമ്മർ ഫാറൂഖ് (26)ആണ് പിടിയിലായത്. ദുബായിൽനിന്ന് എയർ ഇന്ത്യ എക്സ്പ്രസിന്റെ ഐഎക്സ് 356 വിമാനത്തിലാണ് ഇയാൾ കരിപ്പൂരിലെത്തിയത്.
കസ്റ്റംസിനെ വെട്ടിച്ച് വിമാനത്താവളത്തിന് പുറത്തു കടന്ന യാത്രക്കാരനെ പൊലീസ് എയ്ഡ്പോസ്റ്റിന് സമീപംവച്ച് പിടികൂടി ചോദ്യംചെയ്യുകയായിരുന്നു. സ്വർണം ഇല്ലെന്നായിരുന്നു ഇയാൾ പൊലീസിനോട് പറഞ്ഞത്. കൊണ്ടോട്ടിയിലെ സ്വകാര്യ ആശുപത്രിയിൽ എത്തിച്ച് എക്സ്റേ പരിശോധന നടത്തിയപ്പോൾ നാലു സ്വർണഗുളികകൾ ശരീരത്തിൽ ഒളിപ്പിച്ചനിലയിൽ കണ്ടെത്തി. സ്വർണത്തിന് 45 ലക്ഷം രൂപ വരും.
