ന്യൂഡൽഹി
കോൺഗ്രസ് നേതാവ് രാഹുൽ ഗാന്ധി വിദേശത്തേക്ക് പറന്നു. യാത്ര എങ്ങോട്ടാണെന്നതടക്കമുള്ള വിവരം കോൺഗ്രസ് വെളിപ്പെടുത്തിയിട്ടില്ല. യൂറോപ്പ് സന്ദർശനമെന്നാണ് വിവരം. രാഹുൽ നയിക്കേണ്ട ‘ഭാരത് ജോഡോ’ യാത്രയുടെ അവലോകനമടക്കമുള്ള നിർണായക യോഗത്തിൽ രാഹുൽ പങ്കെടുക്കില്ല. ഇതിനു പുറമെ പാർലമെന്റിന്റെ വർഷകാല സമ്മേളനത്തിൽ കോൺഗ്രസ് സ്വീകരിക്കേണ്ട നിലപാട് ചർച്ച ചെയ്യുന്ന യോഗത്തിലും മുൻ അധ്യക്ഷനുണ്ടാകില്ല. 14ന് സോണിയയുടെ അധ്യക്ഷതയിലാണ് യോഗം. ഗോവയിൽ മഹാരാഷ്ട്ര മോഡലിൽ പാർടിയിൽ അട്ടിമറിനീക്കം രൂക്ഷമായിരിക്കെ നടത്തുന്ന വിദേശ സന്ദർശനത്തിനോട് ചില നേതാക്കൾ എതിർപ്പുന്നയിച്ചെന്നാണ് വിവരം.
17ന് തിരിച്ചെത്തുമെന്നാണ് പാർടി അറിയിച്ചിരിക്കുന്നത്. പിറ്റേന്ന് തുടങ്ങുന്ന പാർലമെന്റ് സമ്മേളനത്തിൽ ഒരു തയ്യാറെടുപ്പും ഇല്ലാതെയാകും വയനാട് എംപികൂടിയായ രാഹുൽ പങ്കെടുക്കുക.
