ഇടുക്കി> കട്ടപ്പന വെള്ളയാംകുടിയില് ബൈക്ക് ട്രാന്സ്ഫോര്മറിന്റെ സുരക്ഷാവേലിക്കുള്ളില് കുടുങ്ങിയ സംഭവത്തില് ബൈക്ക് ഓടിച്ചയാളുടേതടക്കം മൂന്ന് പേരുടെ ലൈസന്സ് സസ്പെന്ഡ് ചെയ്തു.മത്സര ഓട്ടത്തിനിടെയാണ് അമിത വേഗതയിലെത്തിയ ബൈക്ക് നിയന്ത്രണം വിട്ട് കുതിച്ചുപൊങ്ങി ട്രാന്സ്ഫോര്മറിന്റെ വേലിക്കെട്ടിനുള്ളില് കുടുങ്ങിയത്. ഇതിന്റെ വീഡിയോ സമൂഹമാധ്യമങ്ങളില് വൈറലായിരുന്നു.
ബൈക്ക് ഓടിച്ച കട്ടപ്പന വലിയകണ്ടം സ്വദേശി വിഷ്ണു പ്രസാദ്, ഒപ്പമുണ്ടായിരുന്ന കിഴക്കേമാട്ടുക്കട്ട സ്വദേശി ആദിത്യ ഷിജു, അയ്യപ്പന്കോവില് സ്വദേശി നിഥിന് ബിജു എന്നിവരുടെ ലൈസന്സാണ് സസ്പെന്ഡ് ചെയ്തത്. . അപകടം ഉണ്ടാക്കിയ ബൈക്ക് ഓടിച്ച വിഷ്ണുവിന്റെ ലൈസന്സ് ആറുമാസത്തേക്കും മറ്റ് രണ്ട് പേരുടെയും ലൈസന്സ് മൂന്ന് മാസത്തേക്കുമാണ് സസ്പെന്ഡ് ചെയ്തത്.
