കുവൈറ്റ് സിറ്റി> കേരള ആര്ട്ട് ലവേഴ്സ് അസോസിയേഷന് കല കുവൈറ്റ് അബ്ബാസിയ മേഖലാ കമ്മിറ്റിയുടെ ആഭിമുഖ്യത്തില് വടംവലി മത്സരം സംഘടിപ്പിച്ചു. ഓക്സ്ഫോര്ഡ് പാകിസ്ഥാനി ഇംഗ്ലീഷ് സ്കൂള് അബ്ബാസിയയില് വെച്ച് നടന്ന മത്സരം കല കുവൈറ്റ് ജനറല് സെക്രട്ടറി ജെ. സജി ഉദ്ഘാടനം ചെയ്തു. ആക്ടിംഗ് പ്രസിഡണ്ട് കെ കെ ശൈമേഷ്, ട്രഷറര് അജ്നാസ് മുഹമ്മദ്, ജോയിന് സെക്രട്ടറി ജിതിന് പ്രകാശ് തുടങ്ങിയവര് ചടങ്ങില് സംബന്ധിച്ചു.
കുവൈറ്റിലെ വിവിധ യൂണിറ്റുകളെ പ്രതിനിധീകരിച്ചു കൊണ്ട് പതിനഞ്ചോളം ടീമുകളാണ് പങ്കെടുത്തത്. മത്സരത്തില് അബ്ബാസിയ സി യൂണിറ്റ്, വിജയികള്ക്കുള്ള ട്രോഫിയും വരിക്കച്ചക്കയും സ്വന്തമാക്കി. റണ്ണേഴ്സ് അപ്പ് ആയ ജലീബ് എ ടീമിന് ട്രോഫിയും ഏത്തക്കുലയും ആണ് സമ്മാനമായി ലഭിച്ചത്. ലൂസേഴ്സ് ഫൈനലില് വിജയികളായ അബ്ബാസിയ ഡി ടീം, ട്രോഫിയും പൂവന് പഴക്കുലയും സ്വന്തമാക്കി.
