സംസ്ഥാന കമ്മിറ്റിയിൽ 75 വയസ് പ്രായപരിധി കർശനമാക്കുന്ന കാര്യത്തിൽ കേന്ദ്ര കമ്മിറ്റി തീരുമാനം നടപ്പാക്കും. 75 വയസ് കഴിഞ്ഞവർക്ക് പുതിയ ഉത്തരവാദിത്തങ്ങൾ നൽകും. താൻ മന്ത്രിസഭയിലേക്ക് എത്തുമെന്ന പ്രചാരണം അഭ്യൂഹം മാത്രമാണെന്നും കോടിയേരി വ്യക്തമാക്കി. അത്തരമൊരു സാഹചര്യം പാർട്ടിയിലില്ല. വിഭാഗീയത പാർട്ടിയിൽ ഇല്ലാതായി. മത്സരം നടന്ന കമ്മിറ്റികളിൽ സംസ്ഥാന സമ്മേളനത്തിന് ശേഷം പരിശോധന നടക്കും. പാർട്ടിയിൽ വ്യക്തിപൂജ അനുവദിക്കില്ലെന്നും നേതാക്കളെ പ്രശംസിക്കുന്ന പാട്ടുകൾ പാർട്ടിയുടേതല്ലെന്നും അദ്ദേഹം പറഞ്ഞു.
കേരളാ കോൺഗ്രസ് നേതാവ് പി ജെ ജോസഫിനെ എൽഡിഎഫിൽ എത്തിക്കുമെന്ന അഭ്യൂഹങ്ങൾക്കും കോടിയേരി മറുപടി നൽകി. ജോസഫിൻ്റെ ഇടതുമുന്നണി സാധ്യതകൾ തള്ളിയ അദ്ദേഹം പുതിയ കക്ഷികളെ മുന്നണിയിൽ എത്തിക്കാൻ ചർച്ചകളില്ലെന്ന് തുറന്നുപറഞ്ഞു. കൂടുതൽ കക്ഷികളെ മുന്നണിയിലെത്തിക്കുന്നതിനല്ല, മറിച്ച് സിപിഎമ്മിൻ്റെ ബഹുജന അടിത്തറ ശക്തിപ്പെടുത്തുന്ന കാര്യത്തിലാണ് പാർട്ടി കൂടുതൽ പരിഗണന നൽകുന്നതെന്നും പറഞ്ഞു.
സിപിഎം സംസ്ഥാന സമ്മേളനത്തിൽ ഭാവി കേരളം എങ്ങനെയാകണം എന്ന കാര്യത്തിൽ പ്രത്യേക ചർച്ചയുണ്ടാകുമെന്ന് സംസ്ഥാന സെക്രട്ടറി പറഞ്ഞു. യുക്രൈനിലെ റഷ്യൻ സൈനിക നടപടിയിൽ പൊളിറ്റ് ബ്യൂറോ നിലപാട് ശരിവെച്ച കോടിയേരി സിപിഎമ്മിൻ്റേത് കൃത്യമായ നിലപടാണെന്ന് വ്യക്തമാക്കി.
യുക്രൈനെതിരായ റഷ്യയുടെ സൈനിക നടപടി നിര്‍ഭാഗ്യകരമാണെന്ന് സിപിഎം സിപിഎം പോളിറ്റ് ബ്യൂറോ പ്രസ്താവനയിലൂടെ കഴിഞ്ഞ ദിവസം വ്യക്തമാക്കിയിരുന്നു. യുദ്ധം ഉടന്‍ അവസാനിപ്പിക്കുകയും സമാധാനം പുലരുകയും വേണം. യുക്രൈനെ നാറ്റോ സഖ്യത്തില്‍ ഉള്‍പ്പെടുത്താനുള്ള ശ്രമം റഷ്യന്‍ സുരക്ഷയ്ക്ക് കടുത്ത ഭീഷണിയാണ്. കിഴക്കന്‍ യൂറോപ്യന്‍ അതിര്‍ത്തിയിലുള്ള നാറ്റോ സഖ്യവും അവരുടെ മിസൈല്‍ സംവിധാനവും റഷ്യന്‍ സുരക്ഷയെ വലിയ തോതില്‍ ബാധിക്കുന്നുണ്ട്. അതിനാല്‍ തന്നെ റഷ്യന്‍ സുരക്ഷയും, ഒപ്പം ഉക്രയ്‌നെ നാറ്റോയില്‍ ഉള്‍പ്പെടുത്തരുതെന്ന വാദവും നീതിപൂര്‍വ്വകമാണ്. സോവിയറ്റ് യൂണിയന്‍ പിരിച്ചുവിട്ടതിന് പിന്നാലെ നാറ്റോ സൈന്യം കിഴക്കന്‍ മേഖലയിലേയ്ക്ക് നീങ്ങുകയായിരുന്നു. അത് യുഎസ് നല്‍കിയ ഉറപ്പുകള്‍ക്ക് വിരുദ്ധമായിരുന്നുവെന്നും സിപിഎം പ്രസ്താവനയിലൂടെ അറിയിച്ചു.
