എവിടെയാണ് വലിയ വരികൾ രൂപപ്പെടാറുള്ളത്. സ്റ്റോറുകൾ, മദ്യവിൽപ്പനശാലകൾ, മ്യൂസിയങ്ങൾ, സ്റ്റേഡിയങ്ങൾ, തിയേറ്ററുകൾ, മാളുകൾ, ഗാലറികൾ, മറ്റ് പൊതുസ്ഥലങ്ങൾ എന്നിവയ്ക്ക് പുറത്തായിരിക്കും ജനങ്ങൾ വരിവരിയായി നിൽക്കുന്നത്. എന്നാൽ കൊവിഡ്-19 മഹാമാരി വന്നതോടെ പലരും ഈ ക്യൂ നിൽക്കുന്ന സംവിധാനത്തോട് അല്പം വിമുഖത കാണിക്കുന്നുണ്ട്. സാധാരണക്കാരുടെ കാര്യമല്ല, പണക്കാരുടെ കാര്യമാണ് ഉദ്ദേശിക്കുന്നത്.
അപ്പോൾ പിന്നെ എന്താണ് മാർഗം? തനിക്ക് പകരം മറ്റൊരാളെ ക്യൂ നിർത്തുക. അങ്ങനെ ചെയ്യുന്നതിന് ക്യൂ നിൽക്കുന്ന വ്യക്തിക്ക് പണം നൽകുക. ഇത്തരത്തിൽ പ്രൊഫഷണൽ ക്യൂവർ ആണ് ഫ്രെഡി ബെക്കിറ്റ്. 20 പൗണ്ട് മുതൽ 160 പൗണ്ട് വരെ ദിവസവും ക്യൂ നിന്ന് സമ്പാദിക്കുന്നവരുണ്ട് എന്നാണ് ഫ്രെഡി ബെക്കിറ്റ് പറയുന്നത്. ചിലർ മണിക്കൂറിനാണ് പണം ഈടാക്കുന്നത്.
‘പ്രൊഫഷണൽ ക്യൂവർ’ അത്ര എളുപ്പമുള്ള ജോലിയല്ല എന്നാണ് ഫ്രെഡി പറയുന്നത്. ഇതിനു പ്രധാന കാരണം നല്ല ക്ഷമ വേണം എന്നതാണ്. മാത്രമല്ല, മഴയോ, മഞ്ഞോ, വെയിലോ ഒന്നും പ്രൊഫഷണൽ ക്യൂവറിന് ഒഴിവുകഴിവുകളല്ല. ലണ്ടൻ സ്വദേശിയായതിനാൽ മണിക്കൂറുകളോളം വരിയിൽ നിൽക്കുന്നത് തനിക്ക് ഒരു പുത്തരിയല്ല എന്നാണ് ഫ്രെഡി ബെക്കിറ്റ് പറയുന്നത്.
ജനപ്രിയ പരിപാടികൾക്കുള്ള ടിക്കറ്റുകൾക്കായി ക്യൂ നിൽക്കാനാണ് പലരും തന്നെ സമീപിക്കാറുള്ളത് എന്നാണ് ഫ്രെഡി ബെക്കിറ്റ് അവകാശപ്പെടുന്നത്. അറുപതിനടുത്ത് പ്രായമുള്ള ചില ആളുകൾക്ക് വേണ്ടി V&A യുടെ ക്രിസ്റ്റ്യൻ ഡിയർ എക്സിബിഷനുവേണ്ടി 8 മണിക്കൂറാണ് താൻ ക്യൂവിൽ നിന്നത് എന്ന് ഫ്രെഡി പറയുന്നു. ഇതിന്‌ മണിക്കൂർ കണക്കിനാണ് പണം ലഭിച്ചത്. അതെ സമയം നല്ല പണമുള്ള യുവാക്കളും തന്നോട് അവർക്ക് വേണ്ടി ക്യൂ നിൽക്കാൻ ആവശ്യപ്പെടാറുണ്ട് എന്ന് ഫ്രെഡി ബെക്കിറ്റ് വ്യക്തമാക്കുന്നു.
