അഡ്ലെയ്ഡ് >ഇംഗ്ലണ്ടിന് റൺമല കയറ്റം കഠിനമാകും. ആഷസ് രണ്ടാം ക്രിക്കറ്റ് ടെസ്റ്റിൽ ഓസ്ട്രേലിയക്ക് 282 റൺ ലീഡായി. മൂന്നാംദിവസം കളി നിർത്തുമ്പോൾ ഓസീസ് രണ്ടാം ഇന്നിങ്സിൽ ഒരുവിക്കറ്റ് നഷ്ടത്തിൽ 45 റണ്ണെടുത്തു. സ്കോർ: ഓസ്ട്രേലിയ 9-473 ഡി, 1-45, ഇംഗ്ലണ്ട് 236.
മൂന്നാം ദിവസം രണ്ട് വിക്കറ്റ് നഷ്ടത്തിൽ 17 റണ്ണുമായി കളി തുടങ്ങിയ ഇംഗ്ലണ്ടിന് ഡേവിഡ് മലാന്റേയും (80) ക്യാപ്റ്റൻ ജോ റൂട്ടിന്റേയും (62) ചെറുത്തുനിൽപ്പ് തുണയായി. ഇരുവരും മൂന്നാം വിക്കറ്റിൽ 138 റൺ അടിച്ചെടുത്തു. ബെൻ സ്റ്റോക്സ് 34 റൺ നേടി.
ഇംഗ്ലണ്ടിന്റെ അവസാന എട്ട് വിക്കറ്റുകൾ വീണത് 86 റണ്ണിനാണ്. മിച്ചൽ സ്റ്റാർക്ക് നാല് വിക്കറ്റെടുത്തു. നഥാൻ ല്യോണിന് മൂന്ന് വിക്കറ്റുണ്ട്. കാമറൂൺ ഗ്രീൻ രണ്ടും വിക്കറ്റെടുത്തു.ഒന്നാം ഇന്നിങ്സിൽ ഓസീസിന് 237 റൺ ലീഡ് ലഭിച്ചു. ഓസീസിന്റെ രണ്ടാം ഇന്നിങ്സിൽ ഓപ്പണർ ഡേവിഡ് വാർണർ (13) റണ്ണൗട്ടായി.
മാർകസ് ഹാരിസും (21*) മിച്ചെൽ നാസറുമാണ് (2*) ക്രീസിൽ. അഞ്ച് മത്സര പരമ്പരയിലെ ഒന്നാം ടെസ്റ്റ് ഓസീസ് ഒമ്പത് വിക്കറ്റിന് ജയിച്ചിരുന്നു.
