കെ കരുണാകരനും എ കെ ആൻ്റണിയുമായി അടുത്ത ബന്ധമുണ്ടായിരുന്ന ചെറിയാൻ ഫിലിപ്പ് കോൺഗ്രസ് ബന്ധം ഉപേക്ഷിച്ചെങ്കിലും സിപിഎമ്മിൽ ചേര്‍ന്നിരുന്നില്ല. എന്നാൽ പല നിയമസഭാ തെരഞ്ഞെടുപ്പുകളിലും ഇടതു സ്ഥാനാര്‍ഥിയായി മത്സരിച്ചു. കെടിഡിസി ചെയര്‍മാനായും നവകേരള മിഷൻ കോര്‍ഡിനേറ്ററായും പ്രവര്‍ത്തിച്ച ചെറിയാൻ ഫിലിപ്പിൻ്റെ നിലപാടുകളും സിപിഎം അനുകൂലമായിരുന്നു. എന്നാൽ ചെറിയാൻ ഫിലിപ്പ് കോൺഗ്രസിൽ തിരിച്ചെത്തുമെന്ന് ഏതാനും ദിവസങ്ങളായി വരുന്ന റിപ്പോര്‍ട്ടുകള്‍ ശരിവെക്കുന്നതാണ് പുതിയ നീക്കങ്ങള്‍.
Also Read:
അതേസമയം, എന്തുകൊണ്ടാണ് എൽഡിഎഫ് ബന്ധം ഉപേക്ഷിച്ച് ചെറിയാൻ ഫിലിപ്പ് വീണ്ടും കോൺഗ്രസിൽ ചേരുന്നതെന്ന കാര്യത്തിൽ വ്യക്തതയില്ല. എ കെ ആൻ്റണിയുമായി വ്യക്തിബന്ധമുണ്ടായിരുന്ന ചെറിയാൻ ഫിലിപ്പിൻ്റെ തിരിച്ചുവരവിലും ആൻ്റണിയ്ക്ക് പങ്കുണ്ട്. രാജ്യസഭാ സീറ്റ് പ്രതീക്ഷിച്ചിരുന്നെങ്കിലും കിട്ടാത്തതാണ് എൽഡിഎഫുമായുള്ള അകൽച്ചയ്ക്ക് കാരണമെന്നു ചില റിപ്പോര്‍ട്ടുകളുണ്ടെങ്കിലും ചെറിയാൻ ഫിലിപ്പ് ഇക്കാര്യം സ്ഥിരീകരിച്ചിട്ടില്ല. രാജ്യസഭാ സീറ്റ് ആവശ്യം ചെറിയാൻ ഫിലിപ്പ് പരസ്യമായി മുന്നോട്ടു വെച്ചെങ്കിലും അംഗീകരിക്കപ്പെട്ടിരുന്നില്ല. ഇതുവരെ മുഖ്യമന്ത്രി പിണറായി വിജയനെയോ സിപിഎം നേതൃത്വത്തെയോ തള്ളിപ്പറയാൻ അദ്ദേഹം തയ്യാറായിട്ടുമില്ല. എന്നാൽ മുൻപ് ഖാദി ബോര്‍ഡ് വൈസ് ചെയര്‍മാൻ സ്ഥാനം വാഗ്ദാനം ചെയ്തെങ്കിലും ചെറിയാൻ ഫിലിപ്പ് ഏറ്റെടുക്കാൻ തയ്യാറാകാതെ വന്നത് സംശയങ്ങള്‍ക്ക് ഇടയാക്കിയിരുന്നു. പുസ്തകരചനയുമായി ബന്ധപ്പെട്ട തിരക്കുകള്‍ മൂലമാണ് താൻ മാറി നിൽക്കുന്നതെന്നായിരുന്നു ചെറിയാൻ ഫിലിപ്പ് പറഞ്ഞത്.
Also Read:
ചെറിയാൻ ഫിലിപ്പിനെ കോൺഗ്രസിൽ തിരിച്ചെത്തിക്കണമെന്ന് ആവശ്യപ്പെട്ട് പത്മജ വേണുഗോപാൽ അടക്കമുള്ള നേതാക്കളും മുൻപ് രംഗത്തെത്തിയിരുന്നു. മരിക്കുന്നതിനു തൊട്ടുമുൻപു പോലും ചെറിയാൻ ഫിലിപ്പിനോടു കെ കരുണാകരൻ ഇക്കാര്യം ആവശ്യപ്പെട്ടിരുന്നുവെന്ന് പത്മജ ഫേസ്ബുക്ക് പോസ്റ്റിൽ കുറിച്ചിരുന്നു. ചെറിയാൻ ഫിലിപ്പ് കരുണാകരന് മകനെപ്പോലെയാൈയിരുന്നുവെന്നും പത്മജ വ്യക്തമാക്കി.
കെഎസ്‍യുവിലൂടെ കോൺഗ്രസിലെത്തിയ ചെറിയാൻ ഫിലിപ്പ് അക്കാലത്തെ ഏറ്റവും ഊര്‍ജസ്വലരായ യുവനേതാക്കളിൽ ഒരാളയിരുനനു. കെഎസ്‍യു സംസ്ഥാന അധ്യക്ഷനായും യൂത്ത് കോൺഗ്രസ് സംസ്ഥാന വൈസ് പ്രസിഡൻ്റായും പ്രവര്‍ത്തിച്ചു. കെപിസിസി സംസ്ഥാന സെക്രട്ടറിയായും പ്രവര്‍ത്തിച്ചു. എന്നാൽ തെരഞ്ഞെടുപ്പിൽ രണ്ട് ടേം നിര്‍ബന്ധമാക്കണമെന്ന് ആവശ്യപ്പെട്ട് പ്രതിഷേധിച്ചാണ് ചെറിയാൻ ഫിലിപ്പ് പാര്‍ട്ടി വിട്ടത്. എന്നാൽ ദേശീയതലത്തിലും സംസ്ഥാനത്തും കോൺഗ്രസ് കടുത്ത പ്രതിസന്ധി നേരിടുകയും പാര്‍ട്ടിയെ ശക്തിപ്പെടുത്താൻ ശ്രമങ്ങള്‍ നടക്കുകയും ചെയ്യുന്നതിനിടയിലാണ് ചെറിയാൻ ഫിലിപ്പ് കോൺഗ്രസിൽ തിരിച്ചെത്തുന്നത് എന്നതാണ് ശ്രദ്ധേയം.
