ഒക്ടോബര്‍ മാസത്തിൽ മാത്രം ഇന്ത്യൻ ഉപഭൂഖണ്ഡത്തോടു ചേര്‍ന്നു രൂപപ്പെടുന്ന അഞ്ചാമത്തെ ന്യൂനമര്‍ദ്ദമാണിത്. നിലവിൽ തെക്കുകിഴക്കൻ അറബിക്കടലിൽ നിന്നു തുടങ്ങി കേരളതീരം പിന്നിട്ട് മധ്യ കിഴക്കൻ അറബിക്കടലിൽ കര്‍ണാടക തീരം വരെ ന്യൂനമര്‍ദ്ദ പാത്തി നിലനിൽക്കുന്നുണ്ട്. ഇതിൻ്റെ ഭാഗമായി കേരളത്തിൽ വിവിധ കേന്ദ്രങ്ങളിൽ മഴ തുടരുന്നതിനിടെയാണ് ബംഗാള്‍ ഉള്‍ക്കടലിൽ പുതിയ ന്യൂനമര്‍ദ്ദം രൂപപ്പെടുന്നത്. ഇതോടു കൂടി സംസ്ഥാനത്ത് മഴ വീണ്ടും ശക്തിപ്പെടുമെന്നാണ് കാലാവസ്ഥാ മുന്നറിയിപ്പ്. ബുധനാഴ്ച വൈകിട്ട് വടക്കൻ കേരളത്തിൽ പലയിടത്തും കനത്ത മഴയ്ക്കും 40 കിലോമീറ്റര്‍ വരെ വേഗതയിൽ വീശുന്ന കാറ്റിനും സാധ്യതയുണ്ടെന്നും മുന്നറിയിപ്പ് നല്‍കിയിട്ടുണ്ട്.
Also Read:
ന്യൂനമര്‍ദ്ദത്തിൻ്റെ പശ്ചാത്തലത്തിൽ ബുധനാഴ്ച മുതൽ ഈ മാസം അവസാനം വരെ വിവിധ ജില്ലകളിൽ യെല്ലോ അലേര്‍ട്ട് നല്‍കിയിട്ടുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, കോഴിക്കോട്, വയനാട് ജില്ലകളിലാണ് ബുധനാഴ്ച യെല്ലോ അലേര്‍ട്ടുള്ളത്. വ്യാഴാഴ്ചയും തിരുവനന്തപുരം മുതൽ ഇടുക്കി വരെയുള്ള ജില്ലകളിൽ യെല്ലോ അലേര്‍ട്ട് നല്‍കിയിട്ടുണ്ട്. ഈ ജില്ലകളിൽ ശക്തമായ മഴയ്ക്ക് സാധ്യതയുണ്ട്. ഒക്ടോബര്‍ 29, 30 തീയതികളിൽ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശൂര്‍, മലപ്പുറം, കോഴിക്കോട്, വയനാട് ജില്ലകളിലും യെല്ലോ അലേ‍ട്ടുണ്ട്. ഒക്ടോബര്‍ 30ന് പാലക്കാട് ജില്ലയിലും യെല്ലോ അലേര്‍ട്ടുണ്ട്.
Also Read:
തുലാവര്‍ഷം ആരംഭിച്ചതോടെയാണ് കേരളത്തിൽ ഒരിടവേളയ്ക്ക് ശേഷം വീണ്ടും മഴ ശക്തിപ്പെട്ടത്. പല ജില്ലകളിലും മഴയ്ക്കൊപ്പം ഇടിമിന്നലുമുണ്ട്. ഈ സാഹചര്യത്തിൽ ജാഗ്രത വേണമെന്ന് കേരള ദുരന്ത നിവാരണ അതോരിറ്റിയും അറിയിച്ചിട്ടുണ്ട്.
അതേസമയം, ജലനിരപ്പ് നിയന്ത്രണവിധേയമായതോടെ ഇടുക്കി ഡാമിൻ്റെ എല്ലാ ഷട്ടറുകളും അടച്ചു. മഴയും നീരൊഴുക്കും കുറഞ്ഞതോടെയാണ് ഷട്ടറുകൾ അടച്ചത്. 137.5 അടിയാണ് മുല്ലപ്പെരിയാര്‍ ഡാമിലെ ജലനിരപ്പ്. ഇടുക്കി ഡാമിലും കക്കി, മാട്ടുപ്പെട്ടി, ആനയിറങ്ങൽ ഡാമുകളിലും ഓറഞ്ച് അലേര്‍ട്ട് തുടരുകയാണ്. ഷോളയാര്‍, പൊന്മുടി, പെരിങ്ങൽക്കുത്ത്, കുണ്ടള, കല്ലാര്‍കുട്ടി ലോവര്‍ പെരിയാര്‍ ഡാമുകളിൽ റെഡ് അലേര്‍ട്ടും പുറപ്പെടുവിച്ചിട്ടുണ്ട്. പത്തനംതിട്ട മൂഴിയാര്‍ ഡാമിൽ യെല്ലോ അലേര്‍ട്ടുമുണ്ട്. ഈ ഡാമുകളിലെല്ലാം ഷട്ടറുകള്‍ വഴി വെള്ളം പുറത്തേയ്ക്ക് വിടുന്നുണ്ടെന്നാണ് സംസ്ഥാന ദുരന്തനിവാരണ അതോരിറ്റി വ്യക്തമാക്കിയിട്ടുള്ളത്.
