അപ്പീൽ പിൻവലിക്കാൻ സർക്കാർ തയ്യാറാകണമെന്ന് സഭ ആവശ്യപ്പെട്ടു. സർവ്വകക്ഷി യോഗത്തിലെ തീരുമാനങ്ങൾക്ക് വിരുദ്ധമാണ് സർക്കാരിന്റെ നിലപാടെന്നും സഭ കുറ്റപ്പെടുത്തി. സർക്കാർ നിലപാടിനു പിന്നിൽ സമ്മർദ്ദമുണ്ടായെന്ന് ന്യായമായും അനുമാനിക്കണമെന്നും സിറോ മലബാർ സഭ പബ്ലിക്ക് അഫയേഴ്സ് കമ്മിറ്റി വാർത്താ കുറിപ്പിൽ ആരോപിച്ചു.
ജനസംഖ്യാനുപാതികമായി നൽകണമെന്ന ഹൈക്കോടതി വിധിക്കെതിരെയാണ് സംസ്ഥാന സർക്കാർ സുപ്രീംകോടതിയെ സമീപിച്ചത്. വിദ്യാഭ്യാസ പിന്നോക്കാവസ്ഥ പരിഗണിക്കാതെ സ്കോളർഷിപ്പ് നൽകിയാൽ അനർഹർക്ക് സഹായം കിട്ടുമെന്നാണ് സർക്കാരിന്റെ വാദം. ഹൈക്കോടതി വിധിക്കെതിരെ സ്വകാര്യ മുസ്ലിം ട്രസ്റ്റും സുപ്രീം കോടതിയെ സമീപിച്ചിട്ടുണ്ട്.
80: 20 അനുപാതത്തിൽ ന്യൂനപക്ഷ സ്കോളർഷിപ്പ് അനുവദിക്കുന്നത് ഭരണഘടനാ വിരുദ്ധമാണെന്നായിരുന്നു ഹൈക്കോടതി വിധി. നിലവിലുള്ള വസ്തുതകൾ പരിശോധിക്കാതെയാണ് ഹൈക്കോടതി വിധിയെന്നാണ് കേരള സർക്കാരിന്റെ വാദം. സർച്ചാർ കമ്മിറ്റി റിപ്പോർട്ടും പാലോളി സമിതി ശുപാർശകളും പരിഗണിച്ചാണ് മുസ്ലിം വിദ്യാർത്ഥികൾക്ക് 80 ശതമാനം സ്കോളർഷിപ്പ് നൽകുന്നത്.
ക്രിസ്ത്യൻ വിഭാഗത്തിന്റെ വിദ്യാഭ്യാസ പിന്നോക്കാവസ്ഥ സംബന്ധിച്ച് രേഖകളില്ല. ഇക്കാര്യം പരിശോധിക്കാനായി ജസ്റ്റിസ് കെ ബി കോശിയെ നിയോഗിച്ചിട്ടുണ്ട്. ഈ റിപ്പോർട്ട് ലഭിച്ച ശേഷമായിരിക്കും പോരായ്മകൾ പരിഹരിക്കുക. കേസിൽ അന്തിമ തീരുമാനമെടുക്കുന്നത് തങ്ങളുടെ ഭാഗം കേട്ടശേഷമായിരിക്കണമെന്ന് ആവശ്യപ്പെട്ട് കേരള കൗൺസിൽ ഓഫ് ച‍ര്‍ച്ചസ് സുപ്രീംകോടതിയിൽ തടസഹ‍ര്‍ജി നൽകിയിട്ടുണ്ട്.
